حضور نبی کریمﷺ ریاست مدینہ دے قیام دے ذریعے انسانی تاریخ دی عظیم ترین تہذیب دی بنیاد رکھی ،ریاست کیتے رہنما اصول وضع کیتے، وزیراعظم عمران خان دا مضمون

اسلام آباد۔17جنوری (اے پی پی):وزیراعظم عمران خان آکھیے جو حضور نبی کریمﷺ ریاست مدینہ دے قیام دے ذریعے انسانی تاریخ دی عظیم ترین تہذیب دی بنیاد رکھی ،ریاست کیتے رہنما اصول وضع کیتے۔اساکوں آپݨی ریاست کوں انہاں بنیادی اصولاں دے مطابق ڈھالݨ دی سعی کرݨی ہوسی، قانون دے احترام دا چیلنج فوری توجہ دا مستحق اے، طاقتور اتے مکار سیاستدان تے مافیا کرپٹ سسٹم دی وجہ توں آپݨی مراعات دا تحفظ کرݨ دے عادی تھی ڳئن اتے انہاں ریاستی اداریں کوں وی کرپٹ بݨا ݙتے، اے خون چوسݨ آلیاں او جونکاں ہن جیڑھے جو ملک دے نال مخلص کائنی ، اے ڳال وزیراعظم عمران خان سنوار کوں قومی اخبارات اچ شائع تھیوݨ آلے آپݨے مضمون اچ آکھی اے ۔ وزیراعظم عمران اپݨے ٹویٹر اکاؤنٹ تے وی اے مضمون شیئر کیتے ۔ ”روح ریاست مدینہ پاکستانی معاشرے دی تشکیل نو” دے عنوان توں آپݨے مضمون اچ وزیراعظم عمران خان آکھیے جو ریاست مدینہ دی روح دے احیا کیتے حکومت قومی رحمت اللعالمین اتھارٹی قائم کیتی، قانون دی حکمرانی اٰں ریاست دا اہم ترین وصف ہئی ، دنیا اچ کامیاب ریاستاں او ہن جھتاں سختی دے نال قانون دا نفاذ کیتا ویندے ، مغرب اتے مشرق اچ جنہاں قوماں خوشحالی حاصل کیتی انہاں ایں اصوض تے عمل کیتا، پاکستان اچ قانون دی حکمرانی کوں نظرانداز کرݨ دے نتیجے اچ قومی خزانے اچ ارباں ڈالر دی لٹ مار تھئی جیں عوام کوں غربت اچ پاتے۔ وزیراعظم آکھیے جو پاکستان کوں جیڑھا چیلنج درپیش اے انہاں اچ فوری توجہ دا مستحق قانون دے احترام دا چیلنج اے، اساکوں ایں کیتے جدوجہد کرݨی اے، اساݙی سیاسی تاریخ اچ طاقتور اتے مکار سیاستدان اتے مافیا قانون توں بالاتر رہݨ دے عادی تھی ڳئن تےکرپٹ سسٹم دی مدد توں حاصل کیتے ڳیاں سہولتاں تے مراعات کوں محفوظ بݨیندن اتے انہان ریاستی اداریں بالخصوص انہاں اداریں کوں جنہاں دا کم ہی قانون دے احترام اتے حاکمیت دی حفاظت کرݨ ہئی ، کوں وی کرپٹ بݨا ݙتے ، ایجھے لوکاں تے مافیا ایں نظام توں خون چوسݨ آلیاں او جونکاں ہن جیڑھے جو ایں ملک دے نال مخلص کائنی ۔ وزیراعظم آکھیے جو پاکستان دی حقیقی قوت، وسائل اتے صلاحیتاں کوں بروئے کار گھن آوݨ کیتے انہاں کوں شکست ݙیوݨ ناگزیر اے۔ وزیراعظم اپݨے مضمون اچ معاشرے دی اخلاقی تعمیر کوں لوکاں دی صوابدید تے چھوڑݨ اتے ریاست دے نیکی و بدی دے تصورات بارے غیرجانبدار تھیوݨ دے خیال کوں فرسودہ قرار ݙیندے ہوئیں اے تصور ریاست کوں آپݨی اخلاقی ذمہ واری نبھاوݨ توں روکیندے تے ایندے مخالفین کوں کھلا موقع ݙیندے او اساݙے تعلیمی نظام اتےذرائع معلومات کوں استعمال کریندے ہوئیں آپݨے بے پناہ وسائل دی مدد توں اساݙی اقدار کوں برباد کرن۔ وزیراعظم آکھیے جو قومی رحمت اللعالمین اتھارٹی سکولاں اتے جامعات اچ سیرت النبیﷺ دی تعلیم دے ذریعے امر بالمعروف دی ذمہ واری ادا کرم کیتے پرعزم اے، ایں توں ساݙے معاشرے دے اخلاقی معیارات اچے تھیسن ۔ وزیراعظم ریاست مدینہ دے فلاحی ریاست دے تصور کوں اجاگر کریندے ہوئیں آکھیے جو ریاست مدینہ تاریخ انسانی دی پہلی ریاست اے جیں اچ کمزور طبقہ دی ذمہ واری چاتی ڳئی ،اساکوں وی نبی کریمﷺ دی ایں سنت دا احیا کرݨا ہوسی ، اساں محدود وسائل دے باوجود احساس پروگرام جیہے اقدامات کیتے اتنے وسائل مختص کیتن جتنے پہلے کݙاہیں نی کیتے ڳئے ، صحت سہولت پروگرام پاکستانی تاریخ دے عظیم منصوبیں اچوں ھک اے جیڑھا جو شہریاں کیتے یونیورسل ہیلتھ دی سہولت ݙیسی ، اے منصوبہ غربت اچ پتھے انہاں کمزور شہریاں دا تحفظ کریسی جیڑھا جو علاج کیتے قرض گھنݨ تے مجبور ہن، ایں توں لک اچ نجی ہسپتالاں دا ھک نیٹ ورک وی وجود اچ آسی ، پنجاب حکومت ایں منصوبے کیتے 400 ارب روپے مختص کیتن ۔ وزیراعظم آپݨی حکومت دی طرفوں احساس سکالرشپ پروگرام دا وی ذکر کیتے اتے آکھیے جو ایں پروگرام دے تحت 6 ملین وظائف ݙتے ویندے پئن جنہاں دی مالیت 47 ارب روپے ہے، پاکستان دی تاریخ اچ تعلیم دے شعبہ اچ ایندی کوئی مثال نی ملدی ۔