اسلام آباد۔8ستمبر(اے پی پی) صدر مملکت آصف علی زرداری آکھیے اساں قوماں دا مقدر بدلݨ اچ تعلیم اتے خواندگی دی اہمیت دے اعتراف اچ عالمی یومِ خواندگی منیندے پیوں ۔ تعلیم اتے خواندگی ساݙی قوم دے مستقبل دی بنیاد ہن ۔ اڄوکے سال دے عالمی یومِ خواندگی دا موضوع “کثیراللسانی تعلیم دا ودھارا: خواندگی برائے سانجھی افہام و تفہیم اتے امن دا ودھارا ” اتحاد، ثقافتی احترام اتے پرامن بقائے باہمی دے ودھارے اچ خواندگی دے کلیدی کردار دی اہمیت اجاگر کریندے ۔عالمی یومِ خواندگی تے آپݨے سنھیے اچ صدر مملکت آصف علی زرداری آکھیے اسلامی جمہوریہ پاکستان دے آئین دے آرٹیکل 25 اے موجب تعلیم ہر انسان دا بنیادی حق اے اتے “ریاست پنج توں سولھاں سال دی عمر دے سارے ٻالاں کوں مفت تے لازمی تعلیم ݙیسی “۔ اڄ اساں ہر شہری کوں ایندی حیثیت توں قطع نظر تعلیم ݙیوݨ دے عہد دی تجدید کریندوں ۔پاکستان ناخواندگی دے وختی مسئلے پاروں قومی تعلیمی ایمرجنسی دا اعلان کیتے ۔ ایں اقدام دا مقصد سکول نہ ونڄݨ آلے ٻلاں کوں سکولاں اچ داخل کرݨ اتے 7 کروڑ بالغ لوکاں کوں تعلیم ݙیوݨ اے ۔ وزیرِاعظم دی روشن پاکستان خواندگی مہم دے تحت، قومی کمیشن انسانی ترقی “ایچ وَن، ٹیچ وَن” پروگرام شروع کیتے، جیں اچ ہر خواندہ شہری توں اپیل کیتی ڳئی اے جو او گھٹ توں گھٹ ھک ناخواندہ بندے کوں تعلیم ݙیوے۔ خواندگی اچ ودھارے سانڳے حکومت بے نظیر تعلیمی وظائف دے ذریعے مستحق ٻالاں کوں اعلیٰ ثانوی سطح تئیں تعلیمی وظائف دی صورت اچ مالی معاونت ݙیندی پئی اے ۔ سارے ضلعیں اچ چھوہر سانڳے 4000 روپے اتے چھوہریں سانڳے 4500 روپے تئیں فی ترائے مہینے وظیفے ݙتے ویندے پئن ، ایں ویلھے 97 لکھ ٻال ایں پروگرام توں فیدہ چیندے پئن ۔ ایں توں انڄ، گھٹ آمدݨ آلے خانداناں دے طالبیں کوں 102,000 اسکالرشپس ݙتیاں ڳئن تاں جو سارے اہل طلبہ کوں انڈرگریجویٹ تعلیم تئیں رسائی مل سڳے ۔ انھاں آکھیے ایں عالمی یومِ خواندگی تے، اساکوں تعلیم دے عالمگیر حق دے ودھارے دے قومی مقصد سانڳے خود کوں ول وقف کرݨا ہوسی۔ اساں سارے رل تے اے امر یقینی بݨا سڳدوں جو ہر پاکستانی کوں سکھݨ، ترقی کرݨ، اتے ھک تعلیم یافتہ، جامع اتے خوشحال قوم دی تشکیل اچ آپݨا حصہ پاوݨ دا موقع ملے ، ساݙے پیارے ملک دے مستقبل دی تشکیل اچ اساں اچوں ہر ھک بندے دا کردار ٻہوں اہمیت رکھیندے۔ میکوں یقین اے جو ساݙی سانجھیاں کوششاں دیر تئیں امن، باہمی افہام و تفہیم اتے ساریں سانڳے ھک روشن مستقبل دی ضامن بݨسن
