بانی چیئرمین پی ٹی آئی اپݨی سوشل میڈیا پوسٹ اچ فوج اتے عدلیہ کوں ٹارگٹ کیتے، ایف آئی اے ایندی تحقیقات کریسی جو اے اکائونٹ کون چلیندے؟ وفاقی وزیر اطلاعات عطاءاللہ تارڑ

اسلام آباد۔13ستمبر(اے پی پی)وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے جو بانی چیئرمین پی ٹی آئی اپݨی سوشل میڈیا پوسٹ اچ فوج اتے عدلیہ کوں ٹارگٹ کیتے، ایف آئی اے ایندی تحقیقات کریسی جو اے اکائونٹ کون چلیندے؟ جمعہ کوں میڈیا نال الیندے انہاں آکھیا جو پی ٹی آئی ہمیشہ صحافیاں کوں نشانہ ٻݨائے، انہاں تے حملے کیتن اتے سوشل میڈیا تے مہماں چلائن، پی ٹی آئی کوں علی امین گنڈا پور دے بیان تے غیر مشروط معافی منڳݨی چاہیدی اے، پی ٹی آئی دور اچ اختلاف رائے کرݨ، اپݨے نظریات رکھݨ، کہیں جماعت دے نظریے نال اختلاف کرݨ جرم ٻݨ چکیے۔ انہاں آکھیا جو تحریک انصاف اپݨے لوکاں کوں اکسائے جو انہاں دے حق اچ ڳالھ نا کرن، انہاں تے الزامات لا ݙیو، اے کے تئیں چلدا رہسیَ اڄ وی یاد اے لاہور اچ ثناء مرزا ڈی ایس این جی تے ہن اتے پی ٹی آئی دے لوک انہاں کوں ہراساں کریندے پئے ہن، صحافی صدف انہاں دے کنٹینر ہیٹھ آ تے موئی ہئی، تریمتیں صحافیاں کوں انہاں ماریے کٹیے، غلیظ زبان استعمال کیتی۔ وزیر اطلاعات و نشریات آکھیا جو علی امین گنڈا پور سٹیج تے صحافیاں دے خلاف جیڑھی زبان استعمال کیتی اے او ٻہوں نامناسب اے، علی امین گنڈا پور ہک صوبے دے وزیراعلیٰ ہین، انہاں کوں تریمتیں اتے فوج بارے اے رویہ مناسب نئیں، ڄیڑھا ادارہ خیبر پختونخوا اچ قربانیاں ݙیندا پئے اوندے خلاف کیا اے کرݨ ٹھیک اے؟ جیڑھے تہاݙی حفاظت کرن انہاں دے خلاف اینڄھی زبان استعمال کرݨ چنڳاں نئیں۔ انہاں آکھیا جو پی ٹی آئی رہنماواں کوں پارلیمنٹ دے ٻاہرو پکڑیا ڳئے جیندا ریکارڈ موجود اے، انہاں کوں خواتین صحافیاں اتے صوبے دیی وزیراعلیٰ دے خلاف غلیظ زبان استعمال کرݨ تے شرم نئیں اتے او اپݨیاں گرفتاریاں تے واویلا شروع کرݨ لڳ ڳن، بانی چیئرمین پی ٹی آئی دی سوچ فسطائیت آلی اے، لیفٹیننٹ جنرل (ر) فیض حمید نال رل تے انہاں اپوزیشن دے ہر رہنما تے کیس ٻݨائن، پتا نئیں انہاں دی کیا پالیسی اے؟ اے ساݙے رہنماواں کوں کوڑے کیسز اچ پھسیندے رہین۔ انہاں آکھیا جو بانی چیئرمین پی ٹی آئی سوشل میڈیا تے فوج اتے عدلیہ کوں ٹارگٹ کیتے، اے انارکی کھنݙاوݨ چاہندن اتے اپݨا مقابلہ شیخ مجیب الرحمان نال کریندن، ایف آئی اے بانی چیئرمین پی ٹی آئی دی پوسٹ دی تحقیقات کریسی جو انہاں دا اکائونٹ کون چلیندے، بانی چیئرمین پی ٹی آئی ملکی سالمیت بارے ولا سازش دی کوشش کیتی اے ڄیڑھی قابل مذمت اے، انہان دی کوئی سازش کامیاب نا تھیوݨ ݙیسوں، بانی چیئرمین پی ٹی آئی وزیر داخلہ تے وی الزام لائن ایندے باوجود جو انہاں کوں جیل اچ ہر سہولت ملی ہوئی اے، ریاست تے حملے دی کہیں کوں اجازت نا ݙتی ویسی۔ انہاں آکھیا جو آئی ایم ایف دا معاہدہ حتمی مراحل اچ اے، مہنگائی سنگل ڈیجٹ تے آ گئی اے، برآمدات ودھدے پن، معاشی اشاریئے مثبت ہین، کرنٹ اکائونٹ خسارہ ڳھٹدا پئے، معیشت دی بہتری دا انہاں کوں ݙکھ اے، انہاں ملکی اداریاں تے حملے شروع کر ݙتن، اے اپݨے عزائم اچ کݙاھیں کامیاب نا تھیسن۔