اسلام آباد۔15ستمبر(اے پی پی) کوآرڈینیٹر صحت ڈاکٹر مختار احمد بھرتھ آکھیے پاکستان توں پولیو مکاوݨ سانڳے چنڳی حکمت عملی نال کم کیتا ویندا پئے ،اعلی معیار دی پولیو مہم دے ذریعے پولیو وائرس کھنڈݨ کوں روکݨ دی حکمت عملی بݨائی ڳئی اے ۔ ترجمان قومی وزارت صحت توں جاری بیان اچ ڈاکٹر مختار احمد بھرتھ آکھیے 115ضلعیں اچ جاری پولیو مہم دا اڄ چھیکڑی ݙینھ اے ، انھاں آکھیے ملک کوں پولیو توں پاک کرݨ سانڳے چنڳی حکمت عملی نال کم تھیندا پئے ، وفاق اتے صوبے رل تے عملی اقدامات یقینی بݨیندے پئن۔ ڈاکٹر مختار احمد بھرتھ والدین توں اپیل کیتی اے جو آپݨے ٻالاں کوں پولیو دے قطرے ضرور پلاون ،پولیو مُکاوݨ سانڳے ہنگامی بنیاداں تے سارے ضروری اقدامات کیتے ویندے پئن، پولیو ورکرز اتے قانون نافذ کرݨ آلے اہلکار ایں مہم دے اصلی ہیرو ہن ،علماء کرام، مذہبی سکالرز، سول سوسائٹی اتے میڈیا پو لیو مکاوݨ اچ آپݨا کردار نبھاون۔
