ترسیلات زر 20 ارب ڈالر توں ودھ ڳئن ،برآمدات اچ ودھارا تھئے ، لارج سکیل مینوفیکچرنگ دے شعبے دی شرح نمو 9 فیصد تھی ڳئی ، کرنٹ اکائونٹ خسارہ ݙاہ مہینے توں سرپلس اے، ایف بی آر دی ٹیکس وصولی 42 کھرب تئیں پج ڳئی اے ،وفاقی وزیر خزانہ اکنامک سروے جاری کرݙتا

اسلام آباد۔10جون (اے پی پی) وفاقی وزیر خزانہ و محصولات شوکت ترین اڄوکے مالی سال دی اقتصادی صورتحال دے تفصیلی احاطہ تے مبنی ’’پاکستان اکنامک سروے 2020-21‘‘جاری کرݙتا جیں دے تحت اڄوکے مالی سال دے دوران معاشی شرح نمو 4 فیصد توں ودھ رہسی ، ترسیلات زر 20 ارب ڈالر توں ودھ ڳئن ، برآمدات اچ ودھارا تھئے ، لارج سکیل مینوفیکچرنگ دے شعبے دی شرح نمو 9 فیصد،زرعی شعبے دی شرح نمو 2.77 فیصد ، کرنٹ اکائونٹ خسارہ ݙاہ مہینے توں سرپلس اے، ایف بی آر دی ٹیکس وصولی 42 کھرب تھی ڳئی اے ، اڄوکے سال مارچ دے چھیکڑ تئیں کل ملکی قرضہ380 کھرب روپے ہے، پرائمری بیلنس پنج سال اچ پہلی واری سرپلس تھئے ، بین الاقوامی مارکیٹ اچ کھنڈ ، خام تیل، پٹرولیم مصنوعات، خوردنی تیل اتے ٻیاں چیزاں دیاں قیمتاں اچ ودھارے دے باوجود حکومت عوام کوں ریلیف ݙتے ، زراعت، صنعت، تعمیرات اتے بئے شعبیں کوں مراعات ݙتیاں ڳئن ،ماحولیاتی آلودگی نال نبݨݨ کیتے بلین ٹری منصوبہ شروع کیتا ڳئے ، چیزاں دیاں قیمتاں اچ معمولی وداھرا کیتے ۔ روشن ڈیجیٹل اکائونٹ اچ ھک ارب ڈالر توں ودھ آچکئن ، عالمی بینک احساس پروگرام دی تعریف کیتی اے ، کامیاب جوان پروگرام توں ملک دے نینگراں کوں فیدہ تھیسی ، حکومت دیاں پالیسیاں توں معیشت مستحکم تھئی اے ، ہݨ اساکوں استحکام توں نمو دے پاسے ونڄݨا ہوسی ، آندے مالی سال دے بجٹ اچ غریباں دا خیال رکھیا ویسی ۔ انہاں خمیس کوں اتھاں ھک پریس کانفرنس دے دوران آندے مالی سال22۔ 2021 دے بجٹ توں پہلے اہم معاشی دستاویز جاری کیتی۔ ایں موقع تے انہاں دے رلے وفاقی وزیر صنعت و پیداوار مخدوم خسرو بختیار، احساس پروگرام دی چیئرپرسن و سینیٹر ڈاکٹر ثانیہ نشتر، وزیر اعظم دے مشیر تجارت عبدالرزاق دائود تے معاون خصوصی محصولات ڈاکٹر وقار مسعود وی موجود ہن۔ وفاقی وزیر خزانہ شوکت ترین آکھیے جو کورونا وائرس دی خوفناک وبا تے ایندے منفی اثرات دے باوجود حکومت دیاں موثر پالیسیاں توں قومی معیشت مستحکم تھیوݨ شروع تھی ڳئی اے ،وبا دے دوران مینوفیکچرنگ، ٹیکسٹائل، زراعت اتے تعمیراتی شعبے کوں مراعات ݙتیاں ڳئن ، اڄوکے مالی سال دے دوران لارج سکیل مینوفیکچرنگ دے شعبے دی نمو 9 فیصد، زراعت دی 2.77 فیصد اے، ڳنے، چاول، کݨک تے ٻیاں فصلاں دی ریکارڈ پیداوار تھئی اے، ترسیلات زر اچ وی ریکارڈ ودھارا تھئے تے اے 20 ارب ڈالر توں ودھ ڳئن ، مالی سال دے چھیکڑ تک 29 ارب ڈالر تئیں ونڄ سڳدی اے ۔ انہاں آکھیے جو پاکستان پہلے خوردنی چیزاں برآمد کرݨ آلا ملک ہئی ، ہݨ ہم درآمد کرݨ آلا ملک بݨ ڳئے ، اجوکے مالی سال دے دوران برآمدات اچ ودھ ڳئن ، ترسیلات زر اچ ودھار توں اے ڳال ثابت تھیندی اے جو ٻاہرلے ملک رہݨ آلے پاکستانی وزیراعظم عمران خان نال خاص لگائو رکھدن ، کرنٹ اکائونٹ خسارہ اساݙا ݙاہ مہینے توں سرپلس اے، فنانشنل ایکشن ٹاسک فورس دے اڳلے جائزے اچ اساکوں ریلیف مل سڳدے ، ایف بی آر دی ٹیکس وصولی اچ اڄوکے مالی سال دے 11 مہینے اچ بہتری آسی اے 4.2 ٹریلین تھی ڳئی ۔جیڑھے پچھلے سال توں ودھ ہن ۔ انہاں آکھیے جو اڳلے مالی سال دا ٹیکس وصولی دا ہدف 58 کھرب روپے رکھیا ڳئے، پرائمری بیلنس پنج سال اچ پہلی واری سرپلس تھئے ، پاکستان کݨک ، کھنڈ گھیو تے دالاں درآمد کریندا پئے ، عالمی مارکیٹ اچ انہاں چیزاں دی جیڑھی قیمت ہوسی ایندے اثرات اساں تے وی پوسن۔ انہاں آکھیے جو کھنڈ دی قیمت 12 مہینے اچ عالمی مارکیٹ اچ 58 فیصد ودھی اے ، اساں صرف 19 فیصد دا ودھارا کیتے ، پام آئل دی قیمت عالمی منڈی اچ 102 فیصد ودھی ہے، اساں صرف 20 فیصد دا ودھارا کیتے، عالمی منڈی اچ سویابین آئل دی قیمت 119 فیصد ودھی اے اساں صرف 23 فیصد ودھائی، خام تیل دی قیمت اچ عالمی منڈی اچ 119 فیصد دا ودھارا تھئے اساں صرف 32 فیصد قیمت ودھائی ۔ انہاں آکھیے جو زراعت دی ترقی تے خصوصی توجہ ݙیوݨ دی لوڑھ اے ،حکومت ایں تے اقدامات کریندی پئی اے جیں توں آڑھتی توں کاشتکاراں دی جان چھٹ ویسی، انتظامی ڈھانچے کوں بہتر بݨاوݨا پوسی ، پاکستان دی سٹاک مارکیٹ دنیا دی چوتھی وݙی تے ایشیا دی بہترین سٹاک مارکیٹ اے۔ اڄوکے سال مارچ دے چھیکڑ تئیں ملک دا مجموعی قرضہ 38 ٹریلین روپے اے، 21۔ 2020 اچ ایندے توں پچھلے مالی سال دے مقابلے اچ 17کھرب دا ودھارا تھئے۔ وزیر خزانہ آکھیے جو تلویں طبقے کوں سہولتاں ݙیوݨ کیتے احساس پروگرام ھک بہترین پروگرام اے تے عالمی بینک وی ایندی تعریف کیتی اے ۔