عالمی اقتصادی مسائل اتے غیر یقینی صورتحال دے مقابلہ کیتے ایس سی او دے رکن ملکاں وچال یکجہتی ضروری اے، پاکستان ایس سی او ملکاں نال نویں تجارتی موقعے اتے اقتصادی تعاون ڳولݨ چاہندے، جام کمال خان

اسلام آباد۔12ستمبر  (اے پی پی) وفاقی وزیر تجارت جام کمال خان  آکھیا جو عالمی اقتصادی مسائل اتے غیر یقینی صورتحال دے مقابلہ کیتےشنگھائی تعاون تنظیم (ایس سی او) دے رکن ملکاں وچال یکجہتی ضروری اے، پاکستان ایس سی او ملکاں نال نویں تجارتی موقعے اتے اقتصادی تعاون ڳولݨ چاہندے۔ پاکستان اہم جغرافیائی اہمیت رکھیندے۔ جنوبی ایشیا ، وسطی ایشیا اتے مشرق وسطیٰ دی تجارتی تے سرمایہ کاری سرگرمیاں دے تزویراتی مرکز دی حیثیت رکھیندے۔ اے ڳالھیں انہاں خمیس کوں ایس سی او دے رکن ملکاں دے اقتصادی امور اتے وزرائے تجارت  دے 23 ویں اجلاس توں خطاب کریندیں ہوئیں آکھی۔ آپݨے افتتاحی خطاب اچ انہاں اجلاس دے شرکا دا پاکستان آوݨ تے خیرمقدم کیتا اتے آکھیا جو اجلاس دی میزبانی پاکستان کیتے اعزاز اے۔ انہاں پاکستان دی حکومت اتے عوام ولوں ایس سی او دے رکن ملکاں کیتے نیک خواہشات دا اظہار کیتا۔ انہاں آکھیا جو اجلاس دا مقصد ایس سی او دے رکن ملکاں وچال اقتصادی تعاون اتے آپسے رابطے ودھاوݨ اے۔ وفاقی وزیر تجارت آکھیا جو ایس سی او دا خطہ دے دنیا دے تیز ترین ترقی کرݨ آلی معیشت تے مشتمل اے جتھ دنیا دی آبادی دا ہک وݙا حصہ رہندے۔ اے خطہ تجارت اتے اقتصادی سانجھ کیتے ٻہوں اہمیت رکھیندے۔ انہاں آکھیا جو آپݨے ملکاں دی ترقی کیتے تجارے دے اہم کردار کوں منیندیں ہوئیں کم کرݨے پوسن۔ وفاقی وزیر آکھیا جو تجارت نہ صرف معاشی ترقی دا سبب ٻݨدی اے بلکہ اے مختلف ملکاں، خطے اتے عوام وچال ݙوپاسہ تعاون، امن تے استحکام وی پیدا کریندی اے۔ جام کمال آکھیا جو جنوبی ایشیا  ،وسطی ایشیا اتے مشرق وسطیٰ دے سنگم تے واقع پاکستان  انتہائی اہم جغرافیائی حیثیت رکھیندے جو تجارت اتے سرمایہ کاری دا ہک قدرتی مرکز اے۔ انہاں آکھیا جو اساں ایس سی او ریجن دی اجتماعی ترقی اتے خوشحالی کیتے رکن ملکاں نال کم کرݨ چاہندوں۔ شنگھائی تعاون تنظیم بارے پاکستان دا عزم کریندیں ہوئیں انہاں آکھیا جو پاکستان ایس سی او رکن ملکاں نال قومی قوانین اتے پالیسیاں دے مطابق تجارت کوں ودھاوݨ کیتے پرعزم اے۔  ایس سی اورکن دی آپسی تجارت دے گزریل سال دے اعدادوشمار دا حوالہ ݙیندیں ہوئیں جام کمال خان آکھیا جو ایس سی او دے رکن ملکاں دی آپسی درآمدات انہاں دی مجموعی درآمدات دے 19 فیصد جڈانجو برآمدارت مجموعی برآمدات دے 14 فیصد مساوی ہن۔  ایس سی او دے کجھ رکن ممالک نال تجارت دے اعدادوشمار پیش کریندیں ہوئیں جام کمال خان آکھیا جو پاکستان اتے بیلاروس وچال آپسی تجارت دا حجم 24-2023 اچ 34.88 ملین ڈالررہیا۔   پاک چین آزادانہ تجارت دے معاہدے بارے پاکستان اتے چین دی تجارت تے تبصرہ کریندیں ہوئیں انہاں آکھیا جو پاکستان اتے چین وچال آزادانہ تجارت دے معاہدے تے 2006 توں عمل تھیندا پئے۔ 24-2023 وچال اساݙی ݙو پاسہ تجارت 14271 ملین ڈالر تئیں ودھ ڳئی اے جئیں اچ پاکستان دی برآمدات 2615ملین ڈالر جڈانجو  درآمدات دا حجم 11656 ملین ڈالر اے۔ پاک ایران ݙوپاسہ تجارت بارے وفاقی وزیر آکھیا جو 2023-24 اچ پاکستان اتے ایران دی آپسی تجارت 880 ملین ڈالر رہی۔  پاکستان اتے قازقستان دی ݙو پاسہ تجارت  24-2023 وچ138.7 ملین ڈالر رہی۔ جام کمال خان  کرغستان  اتے پاکستان دی تجارت دےاعدادوشمار پیش کریندیں ہوئیں آکھیا جو گزریل مالیل سال اچ ݙوہیں ملکاں دی تجارت 11.2 ملین ڈالر رہی اے۔ پاکستان اتے روس دی آپسی تجارت 925  ملین ڈالر ریکارڈ کیتی ڳئی اے۔ انہاں آکھیا جو سال 2023-24 اچ پاک ازبک ملکاں دی تجارت دا حجم 126 ملین ڈالر ریکارڈ کیتا ڳئے۔ پاکستان اتے تاجکستان دے تجارتی اعدادوشمار بارے انہاں آکھیا جو سال 2023-24 اچ ݙوپاسہ تجارت دا حکم 24.6 ملین ڈالر رہیے ۔ ایس سی او دے رکن ملکاں دے مستقبل بارے ڳالھ مہاڑ کریندیں ہوئیں انہاں آکھیا جو اساݙا وژن اے جو ایس سی او ریجن دے آپسی رابطے ودھائے ونجن۔ اساں یقین رکھیندوں جو سانجھی کوششاں نال اساں ایس سی او دے خطے کوں ٻیا بہتر معاشی ترقی اتے خوشحالی دے اہداف ڳھن سڳدوں۔ انہاں آکھیا جو پاکستان سارے رکن ملکاں نال سانجھے مقصد کیتے کم کرݨ چاہندے۔ ایس سی او رکن ملکاں وچال مستحکم سانجھے داری، علاقائی تعاون دے استحکام اتے روشن تے خوشحال مستقبل کیتے اساں ساریاں کوں رَل تے اقدامات کرݨے پوسن۔