اسلام آباد۔14ستمبر(اے پی پی) چین اچ انٹرنیشنل فئیر فار ٹریڈ ان سروسز اچ پاکستان توں 150 کاروباری ادارے شریک ہن ، سانجھے معاہدے تھیسن ۔وفاقی وزیر سرمایہ کاری بورڈ، نجکاری اتے مواصلات عبدالعلیم خان دا بیجنگ عالمی سرمایہ کاری کانفرنس توں ورچوئل خطاب کریندے آکھیے پوری دنیا توں ھک سو ست ملکاں اچوں 2000 توں ودھ کمپنیاں تجارتی میلے اچ شریک ہن تے پاکستان دی نمائندگی چنڳی ڳالھ اے ۔ عبدالعلیم خان آکھیے پاکستان اچ سرمایہ کاری سانڳے زراعت، لائیو سٹاک، فوڈ پراسیسنگ اتے معدنیات دے شعبیں اچ ٻہوں گنجائش موجود اے،پاکستان اچ کولیں دے ݙوجھے وݙے تے تانبے دے ستویں وݙے ذخیرے موجود ہن ، وزیر اعظم پاکستان دے جون دے دورہ چین دے بعد بزنس ٹو بزنس سرگرمیاں اچ ودھارا تھئے چین تے پاکستان وچال یاری دی لازوال تاریخ ویلھے دے نال ٻئی تکڑی تھیندی پئی اے ،پاکستانی کمپنیاں کوں چین توں “بی ٹو بی” سرگرمیاں اچ ودھارے دے موقع ݙیندے پئن ،سی پیک دے تحت پاکستان اچ ٹرانسپورٹ، انفراسٹرکچر، انرجی اتے مواصلاتی شعبیں اچ چںڳاں تھئی اے ، چین توں پاکستان اچ صنعتاں دی منتقلی دا خیر مقدم کریندوں۔ شمالی امریکہ تے یورپ دے مقابلے اچ پاکستان اچ صنعتاں دی منتقلی تے 70 فیصد گھٹ لاڳت آسی ، سرمایہ کاری سانڳے چینی اداریں توں پاکستان اچ ہر ممکن عملی تعاون یقینی بݨیسوں ،صنعتاں دے ودھارے تے توجہ ، سپیشل اکنامک زونز،ایکسپورٹ پراسیسنگ زونز اتے گوادر فری زونز بہترین موقع ہن۔ وفاقی وزیر سرمایہ کاری بورڈ عبدالعلیم خان بیجنگ اچ عالمی کانفرنس کراوݨ تے پاکستانی سفارت خانے کوں خراج تحیسن پیش کیتے تے آکھیے جو چائنہ انٹرنیشنل فئیر فار ٹریڈ ان سروسز توں مثبت اتے شاندار نتیجے دی توقع اے
